नेपालब्रिटेन संवाददाता
लण्डन । गैरआवासीय नेपाली संघ (एनआरएनए) को ११औँ एशिया–प्रशान्त क्षेत्रीय सम्मेलन आगामी अगष्ट १५ र १६ मा चीनको गोन्झाउस्थित क्राउन प्लाजा गोन्झाउ सिटी सेन्टरमा आयोजना हुने भएको छ। सम्मेलनमा नेपालमा लगानी र पर्यटन प्रवर्द्धनका विषयलाई मुख्य प्राथमिकतामा राखेर छलफल गरिने आयोजकले जनाएको छ।
एनआरएनए एशिया प्रशान्त क्षेत्रीय संयोजक दीपक कँडेलका अनुसार “आरोहण २०२६” शीर्षक दिइएको यस सम्मेलनले विश्वभर फैलिएका नेपाली डायस्पोरालाई नेपालका उदीयमान लगानी र पर्यटनका अवसरसँग जोड्ने लक्ष्य लिएको छ। सम्मेलनको जानकारी दिन आगामी आइतबार भर्चुअल पत्रकार सम्मेलन आयोजना गरिने र त्यस अवसरमा विस्तृत कार्यक्रम सार्वजनिक गरिने उनले बताए।
दुई दिने सम्मेलनमा एनआरएनएका पदाधिकारी, अन्तर्राष्ट्रिय लगानीकर्ता, व्यवसायी, कूटनीतिज्ञ तथा युवा प्रतिनिधि गरी ६०० भन्दा बढी सहभागी हुने अपेक्षा गरिएको छ। सम्मेलनमा विशेषगरी जलविद्युत, पर्यटन, सूचना प्रविधि, कृषि तथा पूर्वाधार क्षेत्रमा लगानीका सम्भावनाबारे गहन छलफल हुनेछ। साथै, ‘बीटुबी’ नेटवर्किङ, नीतिगत संवाद, ज्ञान आदानप्रदान तथा सांस्कृतिक कार्यक्रमहरू पनि समावेश गरिनेछन्।
सम्मेलनको पहिलो दिन लगानी केन्द्रित रहनेछ भने दोस्रो दिन पर्यटन प्रवर्द्धन र पुस्तान्तरणमा केन्द्रित हुनेछ। उद्घाटन सत्रमा नेपाल र चीन सरकारका उच्चस्तरीय प्रतिनिधिहरूको सहभागिता रहने अपेक्षा गरिएको छ। समापन समारोहमा ‘गोन्झाउ घोषणापत्र २०२६’ जारी गरिनेछ, जसले आगामी कार्यदिशा तय गर्नेछ।
नेपालको अर्थतन्त्रमा विप्रेषण (रेमिट्यान्स) को ठूलो योगदान रहे पनि त्यसलाई उत्पादनशील क्षेत्रमा रूपान्तरण गर्ने आवश्यकता बढ्दो छ। यस सन्दर्भमा सम्मेलनले नीतिगत बाधाहरू हटाउने र डायस्पोराको पूँजीलाई लगानीमा रूपान्तरण गर्ने उपायहरू खोज्ने लक्ष्य राखेको छ। त्यस्तै, पर्यटन क्षेत्रमा देखिएको पुनरुत्थानलाई दिगो बनाउने विषयमा पनि विशेष ध्यान दिइनेछ।
एनआरएनए सन् २००३ मा स्थापना भएको अन्तर्राष्ट्रिय संस्था हो, जसले विश्वभर रहेका नेपालीहरूलाई एकताबद्ध गर्दै नेपालको सामाजिक–आर्थिक विकासमा योगदान पुर्याउने उद्देश्य राखेको छ। हाल यो संस्था करिब ९० देशमा विस्तार भइसकेको छ।
‘आरोहण २०२६’ सम्मेलनलाई एनआरएनए एशिया–प्रशान्त क्षेत्रका लागि महत्वपूर्ण उपलब्धिका रूपमा हेरिएको छ। यसले डायस्पोराको आर्थिक, सामाजिक र सांस्कृतिक भूमिकालाई थप सुदृढ बनाउँदै नेपालको विकास यात्रामा ठोस योगदान पुर्याउने विश्वास गरिएको छ।
