नेपालब्रिटेन संवाददाता
काठमाडौं । राष्ट्रिय स्वतन्त्र पार्टी (रास्वपा) को केन्द्रीय सदस्य पदका लागि मतदान सम्पन्न भएसँगै दोश्रो चरणको निर्वाचन प्रकृया अगाडि बढाइएको छ। दोश्रो चरणमा पदाधिकारीहरुको लागि मात्र मतदान हुनेछ । पदाधिकारीहरु मध्येपनि कतिपय त निर्विरोध भइसेकेका छन भने केही पदमा निर्वाचन हुनेछ ।
यसैबीच, राष्ट्रिय स्वतन्त्र पार्टी (रास्वपा) को केन्द्रीय सदस्य पदका लागि मतदान सम्पन्न भएको छ । निर्वाचन आयोगका अनुसार गए राति १२ बजे सुरु भएको मतदान आज दिउँसो १२:३० बजे सम्पन्न भएको हो ।
चितवन रास्वपाका सभापति मिनीमाधव खनालका अनुसार महाधिवेशनमा चार हजार १०० प्रतिनिधि रहेकामा तीन हजार ९५० मत खसेको अनुमान गरिएको छ । विद्युतीय मेसिनबाट मतदान भएकाले निर्वाचनको परिणाम दुई घण्टाभित्र सार्वजनिक हुने आयोगले जनाएको छ ।
चितवनको भरतपुरमा जारी रास्वपाको महाधिवेशनअन्तर्गत पहिलो चरणमा ९९ जना सदस्यका लागि मतदान सम्पन्न भएसँगै अब दोस्रो चरणको निर्वाचन प्रक्रिया अघि बढ्ने आयोगले जनाएको छ ।
पार्टीका प्रवक्ता मनिष झाका अनुसार ९९ जना निर्वाचित केन्द्रीय सदस्यहरूले दोस्रो चरणमा हुने निर्वाचनमार्फत पदाधिकारीहरू छान्नेछन् । रास्वपाको पहिलो राष्ट्रिय महाधिवेशन यही असार ७ गते चितवनमा सुरु भएको हो ।
