नेपालब्रिटेन संवाददाता
बाढीपीडित सहयोगार्थ पूजा, भजन, नृत्य तथा राहत संकलन गरिने
लन्डन। लन्डनको प्लमस्टिडस्थित श्री पशुपतिनाथ मन्दिरले हरितालिका तीज २०२६ को अवसरमा विशेष ‘तीज तथा नेपाल बाढीपीडित राहत संकलन कार्यक्रम’ आयोजना गर्ने भएको छ।
मन्दिर व्यवस्थापन समितिका अनुसार कार्यक्रम आगामी १४ सेप्टेम्बर २०२६, सोमबार दुई चरणमा सम्पन्न हुनेछ। पहिलो चरणअन्तर्गत बिहान ८:३० बजे प्लमस्टिडस्थित मन्दिर परिसरमा हरितालिका तीजको अवसरमा सामूहिक पूजा, नित्य आरती तथा विभिन्न धार्मिक अनुष्ठान सञ्चालन गरिनेछ।
त्यसपछि दोस्रो चरण दिउँसो २:०० बजेदेखि साँझ ८:०० बजेसम्म [स्थानको नाम स्पष्ट गर्नुपर्ने] मा हरितालिका तीज तथा राहत संकलन कार्यक्रम आयोजना गरिनेछ।
मन्दिर व्यवस्थापन समितिका अध्यक्ष रोमनाथ पाण्डेले तीजको धार्मिक तथा सांस्कृतिक महत्वलाई संरक्षण गर्दै नेपालमा हालै आएको विनाशकारी बाढीबाट प्रभावित परिवारको सहयोगार्थ कार्यक्रम आयोजना गर्न लागिएको बताए।
कार्यक्रममा पशुपतिनाथ मन्दिरका मूल पण्डित निलहरि घिमिरेबाट सामूहिक पूजा, मंगलाचरण, दीप प्रज्वलन, स्वस्तिवाचनलगायत धार्मिक अनुष्ठान सम्पन्न गरिनेछ। साथै, बाढीपीडितहरूको उद्धार, राहत तथा पुनःस्थापनाका लागि विशेष प्रार्थनासमेत गरिने आयोजकले जनाएको छ।
कार्यक्रममा बेलायतस्थित नेपाली दूतावासका कार्यवाहक राजदूत विपिन दुवाडीसहित दूतावास परिवार, स्थानीय मेयर तथा जनप्रतिनिधि, विभिन्न संघ–संस्थाका प्रतिनिधि, अन्य समुदायका प्रतिनिधि तथा नेपाली संघ–संस्थाका पदाधिकारी एवं सदस्यहरूको उल्लेखनीय सहभागिता रहने ट्रस्टी संयोजक तथा पूर्वअध्यक्ष नरेन्द्र कंडेलले बताए।
कार्यक्रमको मुख्य उद्देश्य नेपालका बाढीपीडित परिवारका लागि राहत संकलन गर्नु रहेको आयोजकले जनाएको छ। सो अवसरमा विभिन्न संघ–संस्था तथा समुदायबाट सहयोगको घोषणा तथा रकम हस्तान्तरणसमेत गरिनेछ।
औपचारिक कार्यक्रमपछि तीजका मौलिक गीत तथा नृत्य, भजन–कीर्तनलगायत विविध सांस्कृतिक प्रस्तुतिहरू रहनेछन्। यस्ता प्रस्तुतिले नेपाली समुदायबीच आपसी सद्भाव, एकता र सहयोगको सन्देश प्रवाह गर्ने मन्दिरकी उपाध्यक्ष एवं कार्यक्रम संयोजक तारा भट्टराईले बताइन्।
आयोजकले बेलायतमा रहेका सम्पूर्ण नेपाली तथा बृहत् समुदायलाई सपरिवार कार्यक्रममा उपस्थित भई तीज पर्वको धार्मिक तथा सांस्कृतिक महत्वको संरक्षणसँगै विपत्तिमा परेका नेपाली दाजुभाइ तथा दिदीबहिनीको सहयोगमा हातेमालो गर्न हार्दिक अपिल गरेका छन्।
