नेपालब्रिटेन संवाददाता
काठमाडौं । चार राष्ट्र सहभागी ट्वेन्टी–ट्वेन्टी अन्तर्राष्ट्रिय श्रृङ्खलामा नेपालले आज युएईसँग प्रतिस्पर्धा गर्दैछ । ट्वेन्टी–ट्वेन्टी श्रृङ्खला अन्तर्गत आफ्नो दोस्रो खेलमा नेपालले युएईसँग खेल्न लागेको हो । युएईविरुद्ध पछिल्लो तीन भेटमा नेपालले दुई खेल जित्दा एकमा हार व्यहोरेको छ ।
नेपालको लक्ष्य आज लगातार दोस्रो जित निकाल्ने हुने छ । पहिलो खेलमा नेपालले घरेलु टोली ओमानलाई ६ विकेटले हराएको थियो । अल अमरेत क्रिकेट मैदानमा खेल नेपाली समय अनुसार दिउँसो पौने १२ बजे शुरू हुनेछ ।
आईसीसी पुरुष ट्वेन्टी–ट्वेन्टी विश्वकप छनोट अन्तर्गतको ग्लोबल छनोट ए अघि नेपालले चारदेशीय श्रृङ्खला खेलिरहेको छ । चारदेशीय अन्तर्राष्ट्रिय ट्वेन्टी–ट्वेन्टी श्रृङ्खलाको हिमालय टेलिभिजन एचडीबाट प्रत्यक्ष प्रसारण भइरहेको छ ।
