नेपालब्रिटेन संवाददाता
काठमाडौँ- सरकारले गत भदौ २३ र २४ गतेको जेनजी आन्दोलनसँग सम्बन्धित भौतिक एवम मानवीय क्षतिको यथार्थ जाँचबुझ गर्न गठित आयोगको म्याद २० दिन थप गर्ने निर्णय गरेको छ ।
प्रधानमन्त्री तथा मन्त्रीपरिषद् कार्यालय सिंहदरबारमा बिहीबार बसेको मन्त्रीपरिषद् बैठकले गौरीबहादुर कार्की नेतृत्वको जाँचबुझ आयोगको म्याद २० दिन थप गर्ने निर्णय गरेको गृहमन्त्री एवम् सरकारका प्रवक्ता ओम प्रकाश अर्यालले जानकारी दिनुभयाे
आयोगको म्याद दोस्रो पटक थप गरिएको हो । यसअघि पनि आयोगको म्याद एक महिना थप गरिएको थियो । आज बसेको बैठकले पुन: दोस्रो पटक २० दिनका लागि म्याद थप गर्ने निर्णय गरेको हो।
गत असोज ५ गते बसेको मन्त्रीपरिषद् बैठकले कार्कीको नेतृत्वमा आयोग गठन गर्नुका साथै सदस्यमा पूर्वप्रहरी अतिरिक्त महानिरीक्षक (एआइजी) विज्ञानराज शर्मा र कानुनविद् विश्वेश्वरप्रसाद भण्डारी रहनुभएको छ ।
गत भदौ २३ र २४ गते भएको जेनजी आन्दोलनमा ७६ जनाको ज्यान जानुका साथै कुल ८४ अर्ब ४५ करोडको सरकारी तथा निजी सम्पत्तिको क्षति भएको प्राराम्भिक विवरण रहेको छ ।
