नेपालब्रिटेन संवाददाता
काठमाडौँ । पछिल्लो २४ घण्टामा नेपालमा थप १५५१ जनामा कोरोना सङ्क्रमण पुष्टि भएको छ । योसँगै नेपालमा कोरोना भाइरसबाट सङ्क्रमितको सङ्ख्या ९० हजार ८१४ पुगेको छ ।
देशका विभिन्न प्रयोगशालामा विगत २४ घण्टामा ११ हजार ४७ जनाको पिसिआर परीक्षण गरिएको स्वास्थ्य तथा जनसङ्ख्या मन्त्रालयको नियमित पत्रकार सम्मेलनमा मन्त्रालयका प्रवक्ता डा जागेश्वर गौतमले जानकारी दिए । हालसम्म १० लाख ९९ हजार २७६ जनाको पिसीआर गरिएको छ ।
हालसम्म ६७ हजार ५४२ जना कोरोना भाइरसबाट मुक्त भई घर फर्किएको प्रवक्ता गौतमले बताए । पछिल्लो २४ घण्टामा २३४० जना सङ्क्रमित निको भएर घर फर्किएका छन् । हाल देशभर २२ हजार ७०९ जना सक्रिय सङ्क्रमित रहेका छन् । हाल ४ हजार २२१ जना संक्रमित क्वारेन्टिनमा रहेका छन् ।
उपत्यकामा १ हजार १७ नयाँ संक्रमित
देशभर कोरोना भाइरसका नयाँ संक्रमितको संख्या दिन दिनै बढिरहेको बेला मंगलबार केही घटेको देखिएको छ । यससँगै काठमाडौं उपत्यकामा पनि संक्रमितको संख्या केही घटेको छ । स्वास्थ्य तथा जनसंख्या मन्त्रालयले आयोजना गरेको पत्रकार सम्मेलनमा दिइएको जानकारी अनुसार मंगबार काठमाडौं उपत्यकामा कोरोनाका १ हजार १७ जना संक्रमित थपिएका छन् । जसमध्ये काठमाडौंमा ७८३ जना, भक्तपुरमा ११८ जना र ललितपुरमा ११८ जना नयाँ संक्रमित थपिएका छन् ।
थप ९ जनाको मृत्यु
कोरोनाको संक्रमणबाट थप ९ जनाको मृत्यु भएको छ । स्वास्थ्य मन्त्रालयका अनुसार मृत्यु हुनेमा चार महिला र पाँच पुरुष छन् । तेह्रथुमका ३१ वर्षीय पुरुष, सुनसरीका ६४ वर्षीय पुरुष, काठमाडौँका ५९ र ६० वर्षीया महिला, ललितपुरकी ६७ वर्षीया महिला तथा ६१ र ७७ वर्षीय पुरुष, चितवनका ७७ वर्षीय पुरुष र नवलपरासीपूर्वका ७७ वर्षीया महिलाको कोरोनाबाट मृत्यु भएको छ । यससँगै नेपालमा कोरोनाबाट ज्यान गुमाउनेको संख्या ५ सय ६३ पुगेको छ । सोमबार १९ जनाको संक्रमणबाट निधन भएको थियो ।
