नेपालब्रिटेन संवाददाता
चीनको पूर्वी क्षेत्रमा चरम गर्मीको चेतावनी जारी भइरहँदा, विश्वविद्यालयका विद्यार्थीहरू तातो र साँघुरो डोर्मेटोरी (छात्रावास) छाडेर पुस्तकालय, सुपरमार्केट, र भुइँतलामा क्याम्प बस्न थालेका छन्।
कतिपय विद्यार्थीहरूले त आफ्नो क्याम्पस नै छाडेर होटलमा रात काटिरहेका छन्। उत्तरपूर्वी शहर चाङचुनका २० वर्षीय एक विद्यार्थीले भने, “हामी कहिलेकाहीं एसीको सुविधा पाइने होटलमै बस्न जान्छौं। वर्षमा केही दिन त असह्य गर्मी हुन्छ।”
चीनका धेरै छात्रावासहरूमा चारदेखि आठ जना विद्यार्थी एउटै कोठामा बस्ने गर्दछन्, र अधिकांशमा एयर कन्डिसनको सुविधा हुँदैन। त्यसैले होटलमा बस्नु अन्तिम विकल्प भए पनि महँगो पर्ने भएकाले सबैका लागि सम्भव छैन।
चीनको सबैभन्दा तातो मौसम मानिने सान्फु सिजन सामान्यतया जुलाईको मध्यतिर सुरु हुन्छ। तर यस वर्ष यो मौसम समयभन्दा अघि नै आएको छ।
पछिल्लो हप्तादेखि चीनको पूर्वी क्षेत्रमा तापक्रम ४० डिग्री सेल्सियसभन्दा माथि पुग्दा अत्यधिक गर्मीले जनजीवन प्रभावित बनाइरहेको छ।
बीबीसी
