लण्डन । गैरआवासीय नेपाली संघ अन्तरर्गतको एक एनसीसी एक च्यारिटी परियोजनाको लागि १० देशका राष्ट्रिय समितिहरुले नेपालमा च्यारिटी परियोजनाको घोषणा गरेका छन् ।
उक्त परियोजना “एक एनसीसी, एक च्यारिटी” को नाममा १० विभिन्न देशका एनआरएनए शाखाहरु द्वारा शुरू गरिएको हो। यस कार्यक्रमको उद्देश्य नेपाली समुदायको विकास र सहयोगलाई प्रवर्धन गर्नु हो।

एनआरएनए का उपाध्यक्ष डा. हेम राज शर्माका अनुसार अष्ट्रेलिया, बेल्जियम, जापान, बहाइन, हङकङ, थाइल्याण्ड, युके, फिनल्यान्ड, नेदरल्यान्ड्स, रूस र स्विट्जरल्याण्डका एनआरएनए शाखाहरुले आफ्नो कार्यकालका लागि विशेष परियोजना छनोट गरेका छन्। यस कार्यक्रम अन्तर्गत, प्रत्येक देशले नेपालको शिक्षा, स्वास्थ्य, पूर्वाधार र परोपकारका क्षेत्रमा एक परियोजना सुरु गर्ने प्रतिबद्धता जनाएको छ।

डा. शर्माका अनुसार “एक एनसीसी, एक च्यारिटी” परियोजना एनआरएनए को एउटा महत्वपूर्ण कार्यक्रम हो जसको उद्देश्य एक कार्यकालमा एउटा एनसीसीले नेपालमा कम्तिमा एक च्यारिटी परियोजना कार्यान्वयन गर्ने परम्परा बनाउनु हो। यो पहल १२ औं विश्व सम्मेलनको अवसरमा बृहत् रूपमा मनाइने छ र सबै परियोजनाहरूको अनुगमन र मूल्यांकन पनि गरिनेछ।

एनआरएनएले परियोजना छनोट गर्ने राष्ट्रिय समितिहरूलाई नेपालमा च्यारिटी कार्यक्रम सञ्चालन गर्न विभिन्न सहयोग र प्रोत्साहन पनि प्रदान गर्ने योजना बनाएको छ। संघले प्रत्येक परियोजनामा १० प्रतिशत प्रोत्साहन रकम उपलब्ध गराउने प्रावधान राखेको छ। साथै, संघले कोष संकलन, सम्बन्धित स्थानीय निकायहरू र संघ-संस्थाहरूसँग समन्वय, परियोजनाको पहिचान र अनुगमनमा सहयोग गर्ने प्रतिबद्धता जनाएको छ।

एनआरएनएले उत्कृष्ट परियोजना सञ्चालन गर्ने एनसीसीलाई आगामी १२ औं विश्व सम्मेलनमा पुरस्कार समेत प्रदान गर्ने जनाएको छ। यो सम्मेलनमा सबै सफल परियोजनाहरूलाई सार्वजनिक गर्ने र थप सहयोगको अवसर प्रदान गर्ने योजना पनि रहेको छ।

संघले आगामी कार्यकालका लागि राष्ट्रिय समितिहरूलाई नेपाली समाजका विभिन्न क्षेत्रहरूमा प्रभाव पार्ने परियोजनाहरू चयन गर्न आग्रह गरेको छ। विशेष गरेर, शिक्षा, स्वास्थ्य र पूर्वाधारका क्षेत्रमा सहयोग पुर्याउने परियोजनाहरूलाई प्राथमिकता दिने योजना छ। यसका अलावा, संघले परोपकारी कार्यमा सहभागी हुने सदस्यहरूको प्रेरणा र उत्साह वृद्धिका लागि विशेष प्रोत्साहन योजना पनि ल्याउने तयारी गरेको छ। यस परियोजनाले गैरआवासीय नेपाली समुदायको सामाजिक दायित्व र नेपालको समृद्धि र विकासमा तिनको भूमिका अझ सशक्त बनाउने विश्वास व्यक्त गरिएको छ।

एनआरएनए को “एक एनसीसी, एक च्यारिटी” परियोजना नेपालका विभिन्न क्षेत्रहरूमा वास्तविक परिवर्तन ल्याउने र गैरआवासीय नेपाली समुदायको एकजुटता र सहयोगलाई अझ बलियो बनाउने प्रयास हो।