नेपालब्रिटेन संवाददाता
काठमाडौं । पूर्व प्रधानमन्त्री एवं नेकपा एकीकृत समाजवादीका अध्यक्ष माधव कुमार नेपालले आगामी ०८४ सालको आम निर्वाचनमा आफ्नो पार्टी देशको पहिलो शक्ति बन्न सक्ने बताएका छन ।
शनिबार काठमाडौंमा आयोजित समाजवादी प्रेस संगठनको कार्यक्रमलाई सम्बोधन गर्दै अध्यक्ष नेपालले यस्तो तर्क गरेका हुन । अध्यक्ष नेपालले जनताको मन र विश्वास जित्दै पार्टीलाई पहिलो शक्तिको रूपमा स्थापित गर्न अहिलेदेखि नै तयारीमा जुट्न नेता–कार्यकर्तालाई निर्देशन समेत दिएका छन । उनले चुनाव जित्नका लागि राजनीति गर्ने नभई समाज रूपान्तरणका लागि राजनीति गर्नुपर्ने बताए ।
अध्यक्ष नेपालले भने, ‘आगामी ०८४ को चुनावको निम्ति अहिलेदेखि नै तयारीमा जुट्नुपर्छ। हामी पनि यहाँ एउटा महत्त्वपूर्ण शक्तिको रूपमा छौँ र पहिलो नम्बरको शक्तिको रूपमा हामी स्थापित हुन सक्छौँ। यदि हामीसँग मन र भावना मिलेकाहरू सँगसँगै जान्छन् भने, पहिलो शक्तिको रूपमा हाम्रो यो पार्टीलाई स्थापित गर्न सक्छौँ ।’
अध्यक्ष नेपालले राजनीतिकर्मीको मुख्य कर्तव्य जनतासँग जोडिनु, उनीहरूको विश्वास जित्नु र संगठन विस्तार गर्न पर्ने पनि बताए । उनले राजनीतिलाई परीक्षासँग तुलना गर्दै भने, ‘पढाइको उद्देश्य ज्ञान प्राप्त गर्नु र परीक्षामा सफल हुनु दुवै हो ।
ज्ञान मात्रै प्राप्त गरेर हुँदैन, परीक्षामा फेल हुनुभयो भने के गर्ने रु त्यसैले राजनीतिमा पनि जनताको सेवा गर्ने र चुनाव जितेर देखाउने दुवै काम गर्नुपर्छ।’ उनले राम्रो काम गर्दागर्दै पनि जनताले भोट नदिए त्यसको कुनै अर्थ नहुने भन्दै जनताको विश्वास जित्ने गरी काम गर्नुपर्नेमा जोड दिए ।
‘राम्रो काम त गरिएको छ, तर जनताले भोटै दिँदैनन् भने तपाईंलाई कसैले पत्याउँछ ? शक्ति नभएकोलाई कसैले पत्याउनेवाला छैन,’ उनले भने। अध्यक्ष नेपालले समाजवादी मोर्चालाई बलियो बनाउने र विचार मिल्ने अन्य वामपन्थी शक्तिहरूसँग एकता गर्दै अघि बढ्ने पार्टीको नीति रहेको पनि स्पष्ट पारे।
