काठमाडौँ । नेपाली कांग्रेसको संसदीय दलको विधान पारित भएको छ । सांसदहरूले छलफल गरी विधान पारित गर्दै अनुमोदनका लागि पार्टीमा पठाएका हुन् । फागुन २१ को निर्वाचनमा कांग्रेसले ३८ सिट जितेको थियो ।

संसदीय दल नेता निर्वाचनका लागि गठित निर्वाचन समितिका संयोजक प्रकाश रसाइली स्नेहीका अनुसार सांसदहरूको छलफलपछि विधान पारित गरेर अनुमोदनका लागि पठाइसकिएको छ । उनले दल नेता चयनका लागि निर्वाचन कार्यतालिकाअनुसार प्रक्रिया अघि बढिरहेको जानकारी दिए ।

उनका अनुसार संसदीय दलको विधानमा ठूलो परिमार्जन गरिएको छैन । निर्वाचन कार्यतालिका अनुसार आज मतदाताको अन्तिम नामावली प्रकाशन गरिएको छ । भोलि बिहान ११ बजेदेखि मध्याह्न १२ बजेसम्म उम्मेदवारको मनोनयन दर्ता हुनेछ । यस्तै, अपराह्न ४ बजेदेखि ५ बजेसम्म मतदान हुने र लगत्तै मतगणना गरिने जनाइएको छ ।