नेपालब्रिटेन संवाददाता
रुकुम । रुकुम पश्चिम आठबिसकोट नगरपालिकाका निमित्त प्रमुख प्रशासकीय अधिकृत रामबहादुर केसीमाथी गएराती खुकुरी प्रहार भएको छ । कार्यालयको काम सकेर कोठातर्फ जाँदै गर्दा बाटोमा लुकेर बसेका सोही नगरपालिका–३ का गोपाल बिक र हरिस बिकले खुकुरी प्रहारगरी घाइते बनाएका हुन् ।
कार्यालयको कामको विषयलाई लिएर आक्रमण भएको बुझिएको छ । घाइते केसीको टाउकोमा गहिरो चोट लागेको छ । चारवटा टाँका लगाइएको छ । उक्त घटनामा सूचना अधिकारी गणेश चन्द पनि घाइते भएका छन् ।
घाईतेलाई स्थानीय मेडिकलमा उपचारगरी थप उपचारका लागि नेपालगन्ज पठाउने तयारी गरिएको छ । आक्रमणकारी फरार रहेको र खोजी कार्य भैइरहेको ईलाका प्रहरी कार्यालयले जानकारी दिएको छ ।
नगरपालिका कर्मचारी र उपमेयर गीता नेपालीले बिज्ञपति जारी गर्दै दोषीलाई तत्काल कारबाहीको माग सहित उक्त घटनामा ३ न वडाका वडा अध्यक्ष केशरमान बिकको योजनामा भएको बताएको छ । यसअघि पनि विवाद आएको थियो ।
