एजेन्सी । कोरोना भाइरसको त्रासका बीच बंगलादेशकी पूर्वप्रधानमन्त्री खालिदा जिया जेलबाट रिहा भएकी छिन् । बंगलादेशकी पूर्व प्रधानमन्त्री एवम् मुख्य विपक्षी दलका नेता समेत रहेकी जियालाई कोरोना भाइरसको आतंकका बीच रिहा गरिएको हो । त्यहाँको विपक्षी नेशनलिष्ट पार्टीले कोरोना महामारीका कारण जेलभित्र समेत संक्रमण बढ्ने खतरालाई ध्यान दिँदै मानवियताका आधारमा जियालाई ६ महिनाका लागि जेलबाट रिहा गरिएको एक विज्ञप्तिमार्फत जानकारी दिएको छ ।

खालिदा जिया निकै महिनादेखि बिरामी समेत छिन् । ७४ वर्षीया जिया उच्च रक्तचापसहित ह्रदयघातको बिमारी समेत हुन् । बंगलादेश नेशनल पार्टीकी प्रमुख उनले भ्रष्ट्राचारको मामलामा १७ वर्षको जेल सजाय भुक्तान गरिरहेकी छिन् । उनी सन् २०१८ फेब्रुअरी ८ मा जेल परेकी थिइन् । बंगलादेशका गृहमन्त्री असद–उज–जमानले भनेका छन्–‘जियालाई मानवीय आधारमा शर्तका साथ रिहा गरिएको हो ।’ स्मरणरहोस्ः जिया सन् १९९१ प्छि ३ पटक बंगलादेशको प्रधानमन्त्री भइसकेकी नेतृ हुन् ।