काठमाडौं । पूर्व प्रधानमन्त्री एवं नेपाली कांग्रेसका सभापति शेरबहादुर देउवाले १५ औं महाधिवेशनका सभापतिको उम्मेदवारका लागि कसैलाई पनि समर्थन गर्ने वचन नदिएको खुलासा गरेका छन ।

आज (मंगलबार) सभापतिलाई भेट्न बूढानीलकण्ठ गएका पाँच पूर्वपदाधिकारीलाई देउवाले आफूले कसैलाई पनि ‘ग्रिन सिग्नल’ नदिएको बताएको भेटमा सहभागी नेता गोपालमान श्रेष्ठले जानकारी दिएका छन ।

नेताहरूको जिज्ञासामा सभापति देउवाले कोही कसैलाई आफूले समर्थन गर्ने नबताएको बताएका थिए । बैठकमा सभापतिसँग आफूले राखेको भनाइबारे श्रेष्ठले भने, ‘१४औं महाधिवेशनमा म सभापतिको उम्मेदवार हुन्छु भनेको थिएँ । तपाईंले १५ औं महाधिवेशनमा मलाई बनाउने वचन दिनु भएको थियो । सोही कारण त्यसबेला मैले उम्मेदवारी छाडेको भन्दा उहाँ (देउवा) हाँस्नुभयो ।’

देउवालाई भेट्न नेताहरू कृष्णप्रसाद सिटौला, प्रकाशमान सिंह, विजय गच्छदार, गोपालमान श्रेष्ठ र डा. प्रकाशशरण महत पुगेका थिए । सात जना पूर्वपदाधिकारी समूहमध्ये विमलेन्द्र निधि र डा. शशांक कोइराला भने भेटमा सहभागी थिएनन् । आजको भेटमा कांग्रेसबाट सरकारमा सहभागी मन्त्रीहरूको कामको मूल्यांकन गरेर फिर्ता गर्न सुझाव दिइएको उनले बताए ।

‘राम्रो काम गर्नेलाई राख्ने र राम्रा काम गर्न नसकेका मन्त्रीलाई हटाउन सुझाव दिऔं,’ श्रेष्ठले भने । बैठकमा सरकारको प्रभावकारिताका विषयमा पनि कुरा भएको उनले बताए ।