काठमाडौं । प्रहरी निरीक्षक दिनेश गुरुङ पक्राउ परेका छन् । जिल्ला प्रहरी परिसर ललितपुरको टोलीले गुरुङलाई हिजो मंगलबार पक्राउ गरेको हो । गुरुङकी पूर्वपत्नीको जाहेरीमा उनी पक्राउ परेका हुन् ।

गुरुङविरुद्ध जबरजस्ती करणी तथा ज्यान मार्ने उद्योगको मुद्धा परेको छ । प्रहरी प्रधान कार्यालय, नक्सालको १ नम्बर गणमा कार्यरत गुरुङलाई मंगलबार थुनामा राखिएको परिसरका एसपी चक्रराज जोशीले जानकारी दिए ।

थुनामा पर्नुअघि गुरुङले फेसबुक पेजमार्फत आफू पूर्वपत्नीबाट पीडित भएको उल्लेख गरेका छन् । उनले पूर्वपत्नीसँगै रहेकी छोरीलाई भेट्न जाँदा आफूमाथि अभद्र व्यवहार भएपछि प्रतिकार गरेको बताएका छन् ।

गुरुङ र उनको पत्नी सुभद्रा दाहालले डीएसपी र दुईजना इन्स्पेक्टरकै अगाडिसमेत हातपात गरेका थिए ।