काठमाण्डौं । गैरआवासीय नेपाली संघ (एनआरएनए) को एकता महाधिवेशनबाट निर्वाचित अध्यक्ष महेश कुमार श्रेष्ठले आफू संगठनभित्र एकता कायम गर्ने मुख्य एजेन्डा लिएर नेतृत्वमा आएको बताएका छन्।

शनिबार साँझ बसेको आफ्नै कार्यसमितिको बैठकलाई सम्बोधन गर्दै अध्यक्ष श्रेष्ठले मे महिनामा सम्पन्न एकता महाधिवेशनमा अध्यक्ष बन्ने व्यक्तिगत चाहना नभए पनि संस्थाभित्र आफ्नै नेतृत्वमा एकता सम्भव हुने विश्वासले जिम्मेवारी स्वीकार गरेको बताए।

“अध्यक्ष पदका लागि केशवजी पनि आकांक्षी हुनुहुन्थ्यो। तर मेरो नेतृत्वमा एकता हुन सक्छ भन्ने सहमतिसँगै म सर्वसम्मत अध्यक्ष बनेँ,” श्रेष्ठले भने। “संस्थाभित्र एकता कायम गर्नुको विकल्प थिएन। महाधिवेशनले दिएको म्यान्डेटअनुसार हामीले सफलतापूर्वक एकता गरेका छौँ।”

श्रेष्ठका अनुसार एकताको खाका तयार गर्न महिनौँसम्म विस्तृत छलफल र परामर्श गरिएको थियो। आगामी दिनमा संगठनलाई थप सुदृढ र व्यवस्थित बनाउँदै लैजान कार्यसमिति प्रतिबद्ध रहेको उनले बताए।

गैरआवासीय नेपाली संघभित्र भइरहेको एकता प्रक्रियाले प्रधानमन्त्री शुसिला कार्की लगायत मन्त्रीहरू समेत उत्साहित भएको बैठकमा जानकारी गराइएको थियो। बैठकमा एनआरएनएका विभिन्न अभियन्ता तथा सदस्यहरूको उपस्थिति थियो।