काठमाडौँ । प्रभु बैंकका प्रमुख कार्यकारी अधिकृत (सीईओ) अशोक शेरचनलाई प्रहरीले पक्राउ गरेको छ । आज केन्द्रीय अनुसन्धान ब्यूरो (सीआईबी)को टोलीले उनलाई पक्राउ गरेको सीआईबीका प्रवक्ता शिब कुमार श्रेष्ठले जानकारी दिए ।

सिइओ शेरचनसहित बैँकका उच्च तहका अधिकारीहरू पनि पक्राउ परेका छन् । उनीहरू बैँकको आर्थिक अपचलन गरेको आरोपमा पक्राउ परेका प्रवक्ता श्रेष्ठले बताए ।

यसअघि कार्तिक २१ गते सीआईबी र नेपाल राष्ट्र बैंकको संयुक्त टोलीले प्रभु बैंकमा छापा मारेको थियो । छापा मार्नुभन्दा पहिले नै प्रभु समूहका अध्यक्ष देवीप्रसाद भट्टचन पक्राउ परेका थिए ।

प्रभु म्यानेजमेन्टकी अध्यक्ष कुसुम लामाले दायर गरेको ९८ करोड रुपैयाँ ठगीको जाहेरीका आधारमा भट्टचन कात्तिक ११ गते ललितपुरबाट पक्राउ परेका थिए । उनीहरूमाथि गम्भीर आर्थिक अपचलनमा अनुसन्धान भइरहेको सीआईबीले जनाएको छ ।