नेपालब्रिटेन संवाददाता
दक्षिण लन्डनमा रहेको एक उच्च आवासीय भवनबाट खसेर एक बालकसहित तीन जनाको मृत्यु भएको छ। मेट्रोपोलिटन प्रहरीका अनुसार उक्त घटना बुधवार बिहान भएको हो।
प्रहरीका अनुसार बिहान ०७:२९ बजे (BST) एलिफेन्ट एण्ड क्यासलस्थित चर्चयार्ड रोमा मानिसहरू उचाइबाट खसेको खबर प्राप्त भएपछि आपतकालीन सेवाहरू घटनास्थलमा पुगेका थिए।
घटनास्थलमा एक पुरुष, एक महिला र एक बालकलाई गम्भीर अवस्थामा फेला पारिएको थियो। उद्धारकर्मीहरूले उनीहरूलाई बचाउने प्रयास गरे पनि तीनै जनालाई मृत घोषणा गरिएको प्रहरीले जनाएको छ।
घटनास्थलमा मेट्रोपोलिटन प्रहरीसँगै लन्डन एम्बुलेन्स सेवा, लन्डन एयर एम्बुलेन्स तथा लन्डन फायर ब्रिगेड पनि खटिएका थिए।
प्रहरीका प्रवक्ताले उक्त घटनालाई हाल “अप्रत्याशित” रूपमा लिइएको बताएका छन् भने अन्य कुनै व्यक्ति घाइते भएको जानकारी प्राप्त नभएको बताएका छन्।
मृतकहरूको औपचारिक पहिचान प्रक्रिया जारी रहेको छ। साथै, मृतकका आफन्तहरूलाई जानकारी गराइसकिएको र उनीहरूलाई विशेष टोलीमार्फत सहयोग प्रदान भइरहेको प्रहरीले जनाएको छ।
