मेक्सिकोको टोलुका विमानस्थल नजिकै एउटा निजी विमान आपत्कालीन अवतरणको प्रयासमा दुर्घटनाग्रस्त भएको छ। दुर्घटनामा विमानमा सवार सबै १० जनाको मृत्यु भएको पुष्टि भएको छ।

विमान प्रशान्त तटको अकापुल्कोबाट उडेको थियो र टोलुका जाँदै थियो। सान माटेओ एटेन्कोको औद्योगिक क्षेत्रमा फुटबल मैदानमा अवतरण गर्ने प्रयास गर्दा धातुको छानामा ठोक्किएर आगो लागेको थियो। मेक्सिको सिटीबाट करिब ५० किलोमिटर टाढा यो क्षेत्र पर्छ।

विमानमा ८ यात्रु र २ चालक दलका सदस्य थिए। दुर्घटनापछि ठूलो आगलागी भएकाले नजिकैका करिब १३० जनालाई सुरक्षित स्थानमा सारिएको सान माटेओ एटेन्कोकी मेयर आना मुनिजले बताइन्।

दुर्घटनाको भिडियो सामाजिक सञ्जालमा भाइरल भएको छ जसमा धुवाँको मुस्लो र आगो देखिन्छ। अधिकारीहरुले घटनाको कारण अनुसन्धान गरिरहेका छन्।