नेपालमा कोरोना संक्रमितको संख्या ८२ पुग्यो

काठमाडौँ । नेपालमा थप ७ जना मानिसमा कोरोना भाइरस (कोभिड १९) को संक्रमण पुष्टि भएको छ । आज नेपालगञ्जको भेरी अञ्चल अस्पतालमा भएको कोरोना परीक्षणमा ७ जनामा कोरोना पुष्टि भएको स्वास्थ्य मन्त्रालयले जनाएको छ।

मन्त्रालयका सह-प्रवक्ता डा समिरकुमार अधिकारीले एक विज्ञप्ती जारी गर्दै भेरी अञ्चल अस्पतालमा भएको कोरोना परीक्षणका क्रममा २२, ३० र ४० वर्षका पुरुष र ९, ३२, ३४ र ५५ वर्षका महिलामा कोरोना पुष्टि भएको बताएका छन् ।

यो सँगै नेपालमा कोरोना संक्रमितको संख्या ८२ पुगेको छ। संक्रमितमध्ये १६ जना उपचारपछि घर फर्किसकेका छन् भने अन्य संक्रमितको विभिन्न अस्पतालमा उपचार भइरहेको छ ।

नयाँ फेला परेका कोरोना संक्रमितको अवस्था सामान्य रहेको पनि स्वास्थ्य मन्त्रालयले जनाएको छ।