नेपालब्रिटेन संवाददाता
काठमाडौँ । नेपालमा कोरोना भाइरसको सङ्क्रमणबाट पछिल्लो २४ घण्टामा थप १४ जनाको मृत्यु भएको छ । स्वास्थ्य तथा जनसंख्या मन्त्रालयको नियमित पत्रकार सम्मेलनमा मन्त्रालयका प्रवक्ता डा जागेश्वर गौतमले मृत्यु हुनेमा १० पुरुष तथा ४ महिला रहेको जानकारी दिए ।
प्रवक्ता गौतमका अनुसार मोरङ, सुनसरी, महोत्तरी, रौतहट,बारा, पर्सा, चितवन, काठमाडौँ, भक्तपुर, ललितपुर, नवलपरासी र रुपन्देहीका गरी १४ जनाको कोरोनाबाट मृत्यु भएको हो । योसँगै नेपालमा कोरोना भाइरसको सङ्क्रमणबाट मर्नेको संख्या २२१ पुगेको छ ।
पछिल्लो २४ घण्टामा नेपालमा आज थप १२२१ जनामा कोरोना सङ्क्रमण पुष्टि भएको छ । योसँगै नेपालमा कोरोना भाइरसबाट सङ्क्रमितको सङ्ख्या ३८ हजार ५६१ पुगेको छ ।
देशका विभिन्न प्रयोगशालामा विगत २४ घण्टामा १२ हजार ७१७ जनाको पिसीआर परीक्षण गरिएकोमा १२२१ जनामा सङ्क्रमण पुष्टि भएको स्वास्थ्य तथा जनसंख्या मन्त्रालयको नियमित पत्रकार सम्मेलनमा मन्त्रालयका प्रवक्ता डा गौतमले जानकारी दिए ।
हालसम २० हजार ८२२ जना कोरोनाबाट मुक्त भइ घर फर्किएको गौतमले बताए । पछिल्लो २४ घण्टामा २६७ जना सङ्क्रमित निको भएर घर फर्किएका छन् । हाल देशभर १७ हजार ५१८ जना सक्रिय सङ्क्रमित रहेका छन् ।
देशभर हाल १७ हजार ५१८ जना आइसोलेशनमा रहेको मन्त्रलयले जनाएको छ । त्यस्तै देशभरका क्यारेन्टिनहरुमा हाल ७ हजार ७९७ जना रहेका छन् ।
