नेपालब्रिटेन संवाददाता
कल्याणपुर । घर परिवारको सुन्दर भविष्य बनाउने सपना बोकेर १३ वर्षअघि वैदेशिक रोजगारीका लागि मलेसिया पुगेका रुपनी गाउँपालिका–२ हरिरावाटोलका दिपककुमार राम सदाका लागि बिदा भएका छन् ।
विदेशमा श्रम बेचेर परिवारलाई खुशी दिने सपना बोकेका ३२ वर्षीय दिपक श्रीमती र दुई सन्तानलाई असहाय अवस्थामा छोडेर संसारबाट बिदा भएका हुन् ।
सोमबार बिहान आएको श्रीमानको मृत्युको खबरले २८ वर्षीया श्रीमती रेणुकुमारी रामको जीवनमा बज्रपात नै भयो । गत शुक्रबार बिहान ११ बजे फोनमा दिपकसँग सामान्य कुराकानी गरेकी रेणुलाई श्रीमानको मृत्यु भएको बारे अझै विश्वास लागेको छैन ।
“शुक्रबार बिहानको ११ बजे फोनमा कुरा भएको थियो, त्यस्तो कुनै समस्या थिएन । स्वास्थ्य पनि ठिकै जस्तो लागिरहेको थियो । शनिबार उहाँको साथीले अस्पताल उपचार भइरहेको जानकारी दिनुभयो, तर सोमबार अचानक मृत्युको खबर आयो ।’’ रेणुले भनिन्, “हाम्रो जीवनमा बज्रपात नै भयो ।’’
तीन जनाको परिवारमा दिपक मात्र कमाउने व्यक्ति थिए । उनको कमाइले छोराछोरीको लालनपालन, पढाइ, घरखर्च सबै चल्थ्यो । अब के गर्ने भन्ने चिन्ताले उनलाई पिरोलेको छ ।
उनको ७ वर्षीय छोरा विप्लव अझै बुझ्ने भइसकेका छैनन् । तीन वर्ष अघि मलेसिया जाँदा दुई वर्षीया छोरी रिषिका पेटमै थिइन् । दिपकले दुई वर्षीया छोरीलाई काँखमा समेत खेलाउन पाएनन् । विदेशिनुको पीडा, परिवारको प्रतीक्षा र अचानक आएको मृत्युको खबरले परिवारलाई दुःखको सागरमा डुबाएको छ ।
मलेसियाको एक प्लास्टिक फ्याक्ट्रिमा करिब एक दशकभन्दा बढी समयदेखि कार्यरत दिपक शुक्रबार अचालन बिरामी भएपछि अस्पताल भर्ना भएको खबर साथीमार्फत प्राप्त भएको उनका आफन्तको भनाइ छ ।
“मेरो श्रीमानको मृत्यु के कारणले भएको हो थाहा छैन । सरकारले यसबारे सत्यतथ्य पत्ता लगाएर उहाँको शव छिटो नेपाल ल्याइदिन आग्रह गर्दछु’’ उनले भनिन् ।
रुपनी गाउँपालिका अध्यक्ष दिनेशकुमार यादवले मृतकका बालबालिकाको पढाइ–लेखाइमा सहयोग गर्ने आश्वासन दिएका छन् । उनले गाउँपालिकाको तर्फबाट हुने सक्दो सहयोग गर्ने प्रतिबद्धता जनाए ।
