नेपालब्रिटेन संवाददाता
काठमाडौँ । निर्माण व्यवसायी महासंघका प्रतिनिधिहरूले गृहमन्त्री ओमप्रकाश अर्याललाई भेटेका छन् ।
नेपाल निर्माण व्यवसायी महासंघका अध्यक्ष रवि सिंहको नेतृत्वमा गएको प्रतिनिधिमूलक टोलीले आज गृहमन्त्री अर्याललाई भेटेको हो ।
भेटमा निर्माण उद्योगलाई चलायमान गराउने विषयमा छलफल भएको छ । निर्माणजन्य कार्यमा असुरक्षाको महसुस हुने वातावरण भएको भन्दै व्यवसायीहरूले ढुक्कसँग काम गर्नसक्ने वातावरण मिलाउन आग्रह गरेका छन् ।
नेपाल निर्माण व्यवसायी महासंघका अध्यक्ष सिंहले भेटबारे जानकारी दिँदै दीपावली पछि निर्माणका काममा तीव्रता दिन लागिएको र उश्रृङ्खल तत्त्वबाट बाधाअड्चन खडा गर्ने भएकाले सुरक्षाको प्रत्याभूति मिलाउन गृहमन्त्रीको ध्यानाकर्षण गराइएको बताए ।
अध्यक्ष सिंहले भने ‘दिपावली पछि निर्माणको काम तीव्रता दिँदैछौं । उश्रृंखल तत्त्वबाट अवरोध खडा गर्नसक्ने भएकाले गृहमन्त्रीको ध्यानाकर्षण गरायौँ । हामीले कार्यक्षेत्रमा गएर काम गर्नका लागि शान्ति सुव्यवस्था हुनपर्यो भनेर गृहमन्त्रीसँग माग गरेका छौँ । गृहमन्त्रीले शान्ति सुरक्षाको पूर्णरुपमा अनुभूति हुनेगरी दिलाउने बताउनु भयो ।’
अध्यक्ष सिंहकाअनुसार शान्ति सुरक्षाका लागि कुनै कसर बाँकी नराख्ने गृहमन्त्रीले भेटका क्रममा बताए । व्यवसायीहरूले कामका क्रममा भोग्नुपरेका कानुनी अड्चनका, समस्याबारेमा समेत गृहमन्त्रीसमक्ष जानकारी गराएका थिए ।
