लण्डन । गैरआवासीय नेपाली संघ (एनआरएनए) को सचिव पदमा अमेरिकाबाट उम्मेदवारी दिएका शंकर खड्काले आफ्नो पक्षमा समर्थन जुटाएका छन् । सचिव पदका दावेदार नारायण काफ्लेले आफ्नो उम्मेदवारी फिर्ता लिदै खड्कालाई समर्थन गरेका हुन् ।

खड्काले बुधवार अनलाइनमार्फत निर्वाचन समितिमा आफ्नो उम्मेदवारी दर्ता गराएका थिए ।

एनआरएनएको अबको नेतृत्व युवा पुस्तामा जानुपर्छ भन्ने मान्यता राख्ने खड्का गैरआवासीय अभियानलाई थप प्रभावकारी पार्न आफूले सचिव पदमा उम्मेदवारी दिएको बताउँछन्।

सन् २००९ मा अमेरिका प्रवेश गरेका खड्काको नेपालमा घर रामेछाप हो। उनी अमेरिका पुगेपछि गैरआवासीय नेपालीको अभियानमा समावेश भएका हुन्। उनले २०१५ मा एनसीसी अमेरिकाको सचिव पदमा रहेर काम गरिसकेका छन्। २०१७ मा आइसीसीले दिएको विभिन्न जिम्मेवारी उनले सफलतापूर्वक पुरा गरेका थिए। हाल उनी आइसीसी सदस्य हुन्।

हाल सपरिवार अमेरिकाको क्यालिफोर्नियामा बसोबास गर्दै आएका एनआरएनएमा रहेको सिण्डिकेट शैली तोड्न पनि आफूले उम्मेदवारी दिएको उनको भनाइ छ।

‘विगतमा पनि मैले गलत प्रवृत्तिको विरोध र खबरदारी गर्दै आएको हुँ। एनआरएनए केही व्यक्ति विशेषको मात्र होइन। हुनु पनि हुँदैन। यहाँको सिन्डिकेट शैली तोड्नु पर्छ,’ खड्काले भने।