नेपालब्रिटेन संवाददाता
रमेश खनाल — कोभेन्ट्रि — बेलायतस्थित नेपाली समुदायको सक्रिय संस्था कोभेन्ट्रि नेपाली समाजले २०२५ को ग्रीष्मकालीन बस भ्रमण कार्यक्रमको आयोजना गर्न लागेको छ। आगामी जुलाई ३१, बिहीबार हुने यस भ्रमणमा वेल्सका चर्चित पर्यटकीय स्थलहरू — लेनवेरिस समुद्र किनारा, स्नोडोनिया, र लेनडुडोन समेटिनेछन्।
समाजले विशेषगरी बालबालिकाको समर विदालाई ध्यानमा राखी उनीहरूका लागि शिक्षाप्रद र रमाइलो बनाउने उद्देश्यले यो कार्यक्रम तय गरेको जनाएको छ। अभिभावक तथा परिवारका अन्य सदस्यलाई पनि समेट्दै पारिवारिक वातावरणमा रमाइलो हुने गरी योजना बनाइएको हो।
कोभेन्ट्रि नेपाली समाजका अध्यक्ष सन्तोष रेग्मीले यसपटकको भ्रमण बालमैत्री, ज्ञानवर्धक तथा प्राकृतिक सौन्दर्यमा आधारित हुने जानकारी दिनुभयो। उहाँका अनुसार मौसम, दूरी र स्थानको उपयुक्ततालाई विचार गरी गन्तव्यहरूको छनोट गरिएको हो।
कार्यक्रमको सफल व्यवस्थापनका लागि अध्यक्ष रेग्मीको संयोजकत्वमा प्रकाश वाग्ले, मणि सापकोटा, नारायण रेग्मी, सुवास अधिकारी लगायतको कार्यदल गठन गरिएको छ। यस्तै, समाजका सक्रिय सदस्य डा. प्रदीप लामिछानेले भ्रमणका स्थलहरूको पूर्वअवलोकन गरी बालबालिकासहित सहभागी हुन सकिने हाइकिङ मार्गहरूको समेत अध्ययन गर्नुभएको थियो।
सामाजिक, सांस्कृतिक तथा शैक्षिक गतिविधिमा सक्रिय कोभेन्ट्रि नेपाली समाजले यसअघि पनि नेपाली भाषा कक्षा सञ्चालन गर्दै आएको छ। आगामी दिनमा पनि यस्ता सिर्जनात्मक कार्यक्रममार्फत समुदायको एकता र नेपाली संस्कृतिको प्रवर्धनमा योगदान पुर्याउने प्रतिबद्धता समाजले जनाएको छ।
