विमान दुर्घटनामा वाग्नर समूहका प्रमुख प्रिगोजिनसहित १० जनाको मृत्यु

संसारभर भाडाका सैनिक उपलब्ध गराउने विशाल सैन्य समूह वाग्नर समूहका प्रमुख येभगेनी प्रिगोजिनको रुसमा भएको एक विमान दुर्घटनामा मृत्यु भएको छ ।

पश्चिम रुसमा १० जना सवार निजी विमान दुर्घटनाग्रस्त भएको हो । सो विमानमा सवार सबै यात्रुको मृत्यु भएको जनाइएको छ । सो विमानमा यात्रा गर्नेहरुको सूचीमा प्रिगोजिनको नाम पनि रहेको रुसी नागरिक उड्डयन प्राधिकरणका अधिकारीले पुष्टि गरेका छन् ।

वाग्नर समूहसँग जोडिएको सामाजिक सञ्जालले वाग्नगरको निजी विमानलाई रुसी वायु सुरक्षाले खसालेको बताएको छ । ग्रे जोन नामक टेलिग्राम च्यानलले रूसका देशद्रोहीहरूका कारण प्रिगोजिनको मृत्यु भएको पोष्ट गरेको छ ।

प्रिगोजिनले गत जुनमा रुसी सशस्त्र सैनिक विरुद्ध विद्रोहको नेतृत्व गरेका थिए । तर रुसी राष्ट्रपति भ्लादिमिर पुटिनको आदेशपछि प्रिगोजिनले मस्को पुग्नु अघि नै आफ्ना सेना फिर्ता गरेका थिए ।

प्रिगोजिनसँग राम्रो सम्बन्ध भएका रुसी वायुसेनाका प्रमुख जनलरल सेर्गेई सुरोविकिनलाई हिजै प्रमुखबाट बर्खास्त गरिएको थियो । साथै प्रिगोजिन चढेको विमान पनि एकै समयमा दुर्घटना हुनु र प्रिगोजिन मारिनुलाई सुनियोजित घटना भएको विश्लेषण गरिएको छ ।

अमेरिकी राष्ट्रपति जो बाइडनले प्रिगोजिनको मृत्यु रुसमा कुनै अनौठो घटना भएको प्रतिक्रिया दिनुभएको छ । सन् २०१४ मा प्रिगोजिनले भाडाकै सैनिक उपलब्ध गराउने वाग्नर समूहको गठन गरेका थिए ।