नेपालब्रिटेन संवाददाता
काठमाडौं । प्रधानमन्त्री केपी ओली नेपाली प्रतिनिधि मण्डलको नेतृत्व गर्दै संयुक्त राष्ट्रसंघको महासभामा सहभागी हुन शुक्रबार अमेरिकाको न्यूयोर्क प्रस्थान गरेका छन् ।
ओलीलाई उपप्रधान तथा सहरी विकासमन्त्री प्रकाशमानसिंह, मन्त्रिहरु, संवैधानिक निकायका प्रमुख, उच्च सरकारी अधिकारी, कुटनीतिक नियोगका प्रतिनिधि तथा सुरक्षा निकायका प्रमुखहरुले अन्तर्राष्ट्रिय विमानस्थलमा बिदाई गरे ।
ओलीसँगै उनकी पत्नी राधिका शाक्य, परराष्ट्रमन्त्री आरजु राणा देउवा, प्रधानमन्त्रीका प्रमुख सल्लाहकार विष्णु रिमाल, परराष्ट्रसचिव सेवा लम्साललगायत सहभागी छन् ।
ओलीले ७ असोजमा कोलम्बिया विश्वविद्यालयमा ‘नेपालको प्रजातन्त्र र आर्थिक समृद्धिको यात्रा’ विषयमा सम्बोधन गर्ने छन् ।
८ असोजमा महासभाको साधारण बहसको उदघाटनसत्र र ९ असोजमा अमेरिकी राष्ट्रपति जो बाइडेनले आयोजना गर्ने स्वागत समारोहमा ओली सहभागी हुनेछन् ।
ओलीले १० असोजमा राष्ट्रसंघ महासभालाई सम्बोधन गर्ने कार्यतालिका छ । ११ असोजमा उनले हार्वर्ड विश्वविद्यालयमा जोन एफ केनेडी जुनियर फोरममा ‘नेपालको परिप्रेक्ष्य: संक्रमणकालीन न्यायबाट जलवायु न्याय’ विषयको कार्यक्रमलाई पनि सम्बोधन गर्ने तालिका छ ।
अमेरिका बसाइमा ओलीले संयुक्त राष्ट्रसंघका महासचिव एन्टोनियो गुटेरेससँग भेटघाट गर्नेछन् । भारतीय प्रधानमन्त्री नरेन्द्र मोदीसँग पनि भेट्ने प्रयास उनको छ । तर मोदीले समय दिइनसकेका कारण भेटको टुंगो लागेको छैन ।
