लण्डन । गैरआवासीय नेपाली संघ (एनआरएनए) यूकेको दुई उपाध्यक्ष पदका लागि चार जनाले उम्मेदवारी दिएपछि रोचक प्रतिस्पर्धा हुने भएको छ।

उपाध्यक्ष पदमा डा. रक्षा थापा, शम्भु अर्याल, उज्वल कार्की र ज्ञानेन्द्र आलेबीच निर्वाचन हुने तय भएको छ। यसअघि पाँच जनाले उम्मेदवारी दिएका थिए तर तिलक भट्टराईले उम्मेदवारी फिर्ता लिएपछि दुई पदका लागि चार जनाबीच प्रतिस्पर्धा हुने भएको हो।

बेलायतको शैक्षिक क्षेत्रमा सक्रिय डा. थापाले एमबीए पूरा गरेकी छन्। त्यसपछि उनले एसीसीए अन्तर्गतको अध्ययनमा भाग लिएकी हुन् र हाल पार्ट–क्वालिफाइड अवस्थामा छन्। उनले हेल्थ एण्ड सोसियल साइन्समा पीएचडी गरेकी छन्।

व्यवसायिक रूपमा उनी माया सपोर्ट लिभिङ, माया इभेन्ट, माया क्रिकेट क्लब र राष्ट्रिय पोशाक घर यूके लगायत संस्थामा लगानीकर्ता हुन्।

शम्भु अर्याल हाल एनआरएनए इंल्याण्ड राज्य परिषद्का अध्यक्ष हुन्। लामो समयदेखि बेलायतमा सामाजिक सेवामा सक्रिय अर्याल सन् २००५ देखि एनआरएनए यूकेमा निरन्तर क्रियाशील छन्।

उज्वल कार्कीले स्टकल्याण्डमा रेस्टुरेन्ट, अफ लाइसेन्स, पोस्ट अफिस लगायत क्षेत्रमा लगानी गरेका छन्। नेपालमा शंखुवासभामा उनले रुद्राक्ष व्यवसाय पनि सञ्चालन गरेका छन्। विगत १८ वर्षदेखि बेलायतमा बसोबास गर्दै आएका कार्की अध्ययनका लागि बेलायत आएका थिए र उनले यहाँबाट मास्टर डिग्री हासिल गरेका छन्।

ज्ञानेन्द्र आले विगत १० वर्षदेखि एनआरएनए यूकेमा सक्रिय छन्। उनले कार्यसमिति सदस्यदेखि कार्यवाहक महासचिवसम्मका जिम्मेवारी सम्हालेका छन्। उनले वंशजको नागरिकताको निरन्तरता, पुस्तान्तरण, गोर्खा आन्दोलन लगायतका क्षेत्रमा काम गर्ने प्रतिबद्धता जनाएका छन्।