नेपालब्रिटेन संवाददाता
काठमाडौँ । नवलपरासी पूर्वमा छोराको कुटपिटबाट बुवाको मृत्यु भएको छ।
हुप्सेकोट गाउँपालिका-१ जुगेपानीका ६० वर्षीय रामबहादुर विकलाई उनकै छोरा ३० वर्षीय सन्तकुमार विकले मंगलबार राति कुटपिट गरेका थिए।
जिल्ला प्रहरी कार्यालय नवलपरासी पूर्वका अनुसार घरायसी विवाद र झैँ-झगडा हुँदा सन्तकुमारले आफ्ना बुवा रामबहादुरलाई मुक्का प्रहार गरी गम्भीर घाइते बनाएका थिए। उनलाई उपचारका लागि मध्यबिन्दु अस्पताल डण्डा लगिएको थियो।
अस्पतालका डाक्टरले रामबहादुरलाई गए राति १२ बजे मृत घोषणा गरेको हो। कुटपिट गर्ने सन्तकुमारलाई प्रहरीले नियन्त्रणमा लिएर घटना सम्बन्धी थप अनुसन्धान गरिरहेको छ।
