काठमाडौँ । नेपाल भ्रमणमा रहेका बेलायती सेनाअन्तर्गत गोर्खा ब्रिगेडका कमान्डेन्ट मेजर जनरल गेराल्ड स्ट्रिकल्यान्डको नेतृत्वमा आएको प्रतिनिधिमण्डलले राष्ट्रपति रामचन्द्र पौडेलसँग भेटवार्ता गरेको छ।

राष्ट्रपति कार्यालय शीतल निवासमा सोमबार भएको भेटमा मेजर जनरल स्ट्रिकल्यान्डसँगै डेभिड जे. रोविन्सन पनि सहभागी थिए।

उक्त अवसरमा नेपालका लागि बेलायतका राजदूतसमेत उपस्थित थिए। भेटका क्रममा मेजर जनरल स्ट्रिकल्यान्डले ‘ब्रिगेड अफ गुर्खाज’ को सन् २०२५ का लागि तयार पारिएको वार्षिक प्रतिवेदन राष्ट्रपति समक्ष प्रस्तुत गरेका थिए।

राष्ट्रपति कार्यालयका अनुसार भेटमा नेपाल-बेलायतबीचको दीर्घकालीन सम्बन्ध, साझा हित तथा दुवै पक्षका चासोका विषयमा विचार-विमर्श गरिएको थियो। भेटघाट सौहार्दपूर्ण वातावरणमा सम्पन्न भएको जानकारी राष्ट्रपति कार्यालयका प्रवक्ता रितेशकुमार शाक्यले दिएका छन्।