काठमाडौँ । वैदेशिक रोजगारीका नाममा विभिन्न देश पठाइदिने भन्दै रकम असुली गरी सम्पर्कविहीन हुने चार जनालाई प्रहरीले पक्राउ गरेको छ।

काठमाडौँ उपत्यका अपराध अनुसन्धान कार्यालय ले जारी गरेको प्रेस विज्ञप्तिअनुसार बेरोजगार युवायुवतीलाई आकर्षक तलबको प्रलोभनमा पारी विदेश पठाइदिने भन्दै ठगी गरिएको उजुरीपछि अनुसन्धान अघि बढाइएको थियो।

अनुसन्धानका क्रममा टर्की पठाइदिने भन्दै ठगी गरेको आरोपमा दिपेश गुरुङ र सौगात गुरुङ पक्राउ परेका छन्। दुवै जना गोरखाको बारपाक सुलिकोट गाउँपालिका-६ स्थायी घर भई हाल काठमाडौँ महानगरपालिका-२६ मा बसोबास गर्दै आएका थिए।

प्रहरीका अनुसार उनीहरूले आठ जना पीडितबाट कुल ८६ लाख २२ हजार ५७० रुपैयाँ असुल गरेको आरोप छ। उनीहरूलाई जेठ ५ गते काठमाडौँ महानगरपालिका-२६ बाट पक्राउ गरिएको जनाइएको छ।

त्यसैगरी साइप्रस पठाइदिने भन्दै रकम लिएको आरोपमा सूर्यप्रकाश खेजुम पक्राउ परेका छन्। पाँचथरको फिदिम नगरपालिका-१० स्थायी घर भएका उनी हाल ललितपुरको गोदावरी नगरपालिका-२२ मा बस्दै आएका थिए। एक जना पीडितबाट ९ लाख ५० हजार रुपैयाँ लिएको आरोपमा उनलाई जेठ ५ गते पक्राउ गरिएको हो।

लिथुआनिया पठाइदिने आश्वासन दिएर ठगी गरेको आरोपमा शान्ति श्रेष्ठ पनि पक्राउ परेकी छन्। काभ्रेपलाञ्चोकको भुम्लु गाउँपालिका-५ स्थायी घर भई हाल भक्तपुरको सूर्यविनायक नगरपालिका-३ मा बस्दै आएकी श्रेष्ठमाथि एक जना पीडितबाट १ लाख ९३ हजार रुपैयाँ लिएको आरोप छ। उनलाई जेठ ६ गते काठमाडौँ महानगरपालिका-३० बाट नियन्त्रणमा लिइएको प्रहरीले जनाएको छ।

पक्राउ परेका सबैलाई थप अनुसन्धान तथा आवश्यक कारबाहीका लागि वैदेशिक रोजगार विभाग ताहाचल पठाइएको प्रहरीले जनाएको छ।