लण्डन । गैरआवासीय नेपाली संघ (एनआरएनए) को आगामी अक्टोबरमा हुने निर्वाचनलाई लक्षित गर्दै चुनावी सरगर्मी तीव्र बन्दै गएको छ।

संघको १२औं महाधिवेशन आगामी अक्टोबर ११ देखि १३ तारिखसम्म काठमाण्डौंस्थित सोल्टी होटलमा आयोजना हुने तय भएको छ। महाधिवेशनसँगै निर्वाचन प्रक्रियाको तयारी समेत तीव्र गतिमा भइरहेको छ। यसै सन्दर्भमा संघका केन्द्रीय पदाधिकारीहरू अमेरिका प्रस्थान गर्ने भएका छन्।

गैरआवासीय नेपाली संघ अमेरिका (एनआरएनए-यूएसए) का अध्यक्ष विकास उप्रेतीका अनुसार संघका अध्यक्ष डा. बद्री केसी र उपाध्यक्षद्वय रविन शेरचन अमेरिका पुग्ने कार्यक्रम तय भएको छ। उनीहरूले सेप्टेम्बर १३ मा टेक्सासस्थित हिल्टन होटलमा हुने बृहत् राष्ट्रिय भेला तथा कार्ययोजना सम्मेलनमा सहभागिता जनाउनेछन्। सो कार्यक्रममा महासचिव गौरीराज जोशी पनि सहभागी हुनेछन्।

संघको महाधिवेशनका लागि पहिलो चरणमा करिब ४ हजार ५ सय प्रतिनिधिहरूले नाम दर्ता गरिसकेका छन्। ती प्रतिनिधिहरूको अन्तिम सूची अगस्ट ३१ भित्र राष्ट्रिय समितिहरूले टुंग्याउनुपर्ने संघले जनाएको छ।