नेपालब्रिटेन संवाददाता
लन्डन । गैरआवासीय नेपाली संघ (एनआरएनए) यूकेको अध्यक्षमा राजेन्द्र पुडासैनी निर्वाचित भएका छन्। आगामी कार्यकालका लागि शनिबार सम्पन्न निर्वाचनमा पुडासैनीले १४८२ मत प्राप्त गर्दै विजयी भएका हुन्।
उनका निकटतम प्रतिस्पर्धी गोविन्द खरेलले ९७९ मत प्राप्त गरे भने अर्का उम्मेदवार मनिष खरेलले ४९६ मत प्राप्त गरे।
नुवाकोट जिल्लाको साविक जिलिङ गाउँपालिका–२ (हाल बेलकोटगढी नगरपालिका–८) निवासी पुडासैनी स्वर्गीय उपेन्द्र पुडासैनी र लोकमाया पुडासैनीका माइला सुपुत्र हुन्। करिब २५ वर्षअघि अध्ययनका लागि बेलायत आएका उनी हाल बेलायतको राष्ट्रिय स्वास्थ्य सेवा (एनएचएस) मा विगत १५ वर्षदेखि कार्यरत छन्।
पुडासैनीले बेलायतको प्रतिष्ठित विश्वविद्यालयबाट एमबीए र बीएससी अनर्स डिग्री प्राप्त गरेका छन्।
नेपालमा रहँदा उनी सरस्वती बहुमुखी क्याम्पसमा स्वतन्त्र विद्यार्थी युनियन (स्ववियु) का सभापति थिए। बेलायत आएपछि उनले यहाँको ट्रेड युनियन आन्दोलनमा समेत सक्रिय भूमिका खेलेका छन्। हाल उनी बेलायतकै एक प्रमुख ट्रेड युनियन “जीएमबी नेशनल युनियन” अन्तर्गत लन्डन सेन्टर नर्थ शाखाको सचिव पदमा कार्यरत छन्।
यसअघि उनी यती नेपाली एसोसिएसन यूकेको दुई कार्यकाल महासचिव, प्रवासी नेपाली मञ्च बेलायतको अध्यक्ष तथा विभिन्न नेपाली संघसंस्थामा सल्लाहकारको भूमिकामा रहेका थिए। साथै, एनआरएनए अन्तर्राष्ट्रिय समन्वय परिषद् मा २०२१–२३ कार्यकालका लागि सदस्य समेत रहेका थिए।
