स्पेनका यातायातमन्त्रीले रेल दुर्घटनाको छ दिनपछि दिए राजीनामा

स्पेनका यातायातमन्त्री ओस्कार पुएन्तेले भीषण रेल दुर्घटना भएको छ दिनपछि पदबाट राजीनामा दिएका छन्। गत अक्टोबर २८ मा भएको उच्च गतिको रेल दुर्घटनामा कम्तीमा ६९ जनाको मृत्यु भएको थियो भने दर्जनौँ यात्रु घाइते भएका थिए।

मंगलबार साँझ स्पेनको संसद् (कंग्रेस) मा दुर्घटनाबारे आफ्नो धारणा राखेपछि उनले राजीनामाको घोषणा गरेका हुन्। राजधानी म्याड्रिडको दक्षिणमा रहेको उर्दा सहरनजिक भएको उक्त दुर्घटनामा एउटा रेल रोकिराखिएको अर्को रेलको पछाडिको भागमा ठोक्किएको थियो।

राजीनामाको घोषणा गर्दै पुएन्तेले भने, “स्पेनजस्तो देशमा एक वर्षभन्दा कम अवधिमा यति गम्भीर प्रकृतिका दुई दुर्घटना भएपछि यातायातमन्त्री पदमा रहिरहन सक्दैन।”

उनले गत जनवरीमा सोही रेलमार्गमा भएको अर्को दुर्घटनालाई पनि उल्लेख गरेका थिए, जसमा ४६ जनाको ज्यान गएको थियो।

गत साताको दुर्घटना आधुनिक युरोपेली इतिहासकै सबैभन्दा भीषण रेल दुर्घटनामध्ये एक मानिएको छ। सन् २०१३ पछि स्पेनमा भएको यो सबैभन्दा ठूलो रेल दुर्घटना हो।

संसद्मा लामो समयसम्म चलेको छलफलका क्रममा पुएन्तेले रेल सुरक्षासम्बन्धी नयाँ उपायहरू प्रस्तुत गरेका थिए। तर विपक्षी दलका सांसदहरूले उनको भूमिकामाथि कडा प्रश्न उठाएका थिए।

उनले यातायातमन्त्री पदबाट मात्र नभई आगामी निर्वाचनका लागि आफ्नो उम्मेदवारीसमेत फिर्ता लिने घोषणा गरे।

दुर्घटनापछि पुएन्तेमाथि राजीनामा दिन दबाब बढ्दै गएको थियो। प्रमुख विपक्षी कन्जरभेटिभ पिपुल्स पार्टी (पीपी), दक्षिणपन्थी दल भोक्स तथा सरकारका केही सहयोगी दलहरूले समेत उनको राजीनामा माग गरेका थिए।

विपक्षी दलहरूले देशको उच्च गतिको रेल प्रणालीको सुरक्षा सुनिश्चित गर्न नसकेको भन्दै मन्त्रीले जिम्मेवारी लिनुपर्ने बताएका थिए। प्रधानमन्त्री पेद्रो सान्चेजले समेत रेल प्रणालीप्रतिको जनविश्वास कमजोर भएको स्वीकार गरेका थिए।

दुर्घटनाका लागि मानवीय त्रुटिलाई जिम्मेवार ठहर्‍याएको भन्दै विपक्षीहरूले पुएन्तेको आलोचना गरेका थिए। उनीहरूले मन्त्रीले आफ्नो कमजोरीबाट ध्यान अन्यत्र मोड्न खोजेको आरोप लगाएका थिए।

केही दिनअघि मात्रै पदमै रहने बताएका पुएन्तेको राजीनामाले धेरैलाई आश्चर्यमा पारेको छ।

यो दुर्घटना र मन्त्रीको राजीनामा स्पेनको राजनीतिक दृष्टिले पनि महत्त्वपूर्ण समयमा आएको छ। स्पेनमा आगामी नोभेम्बर २९ मा मध्यावधि आमनिर्वाचन हुँदैछ।