भारतको गणतन्त्र दिवसकै दिन मागियो सुगौली सन्धीमा गुमेको नेपालको जमिन
काठमाडौं–भारतको गणतन्त्र दिवसका दिन सुगौली सन्धिपूर्वको जमिन फिर्ता माग गरिएको छ ।
ग्रेटर नेपाल राष्ट्रवादी मोर्चाले भारतको ७० औं गणतन्त्र दिवसका अवसरमा भारतीय जनताप्रति हार्दिक बधाई र कृतज्ञता ज्ञापन गर्दै भारतीय सरकारले भने नेपालको भूमि फिर्ता गर्नुपर्ने माग गरेको हो ।
‘१९४७ अगस्त १५ यता विगत ७३ वर्षदेखि नेपालको करिब ६०००० वर्ग किलोमिटर जमिन कब्जा गरेर त्यहाँ गणतन्त्र दिवस मनाउनु प्रजातन्त्र , स्वतन्त्रता र मानव अधिकारको घोर अपमान हो’ मोर्चाका अध्यक्ष फणिन्द्र नेपालले जारी गरेको विज्ञप्तिमा भनिएकोछ, ‘ लामो समयसम्म उपनिवेशमा रहेर स्वतन्त्रता प्राप्त गरेको भारतले नेपाली भूमिको स्वतन्त्रतामाथि सैनिक बुट प्रहार गर्नु सामान्य कुरा नभएर जघन्य अपराध हो र उसले यो अपराध बोध नगर्नु झन् ठूलो अपराध हो ।’
अर्काको सम्पत्ति लुटेर धनी हुने सामन्तजस्तै भारतले नेपाली जमिन कब्जा गरेर आफ्नो क्षेत्रफल बढाउनु लाजमर्दो र क्षोभजनक कुरा भएको विज्ञप्तिमा उल्लेख छ ।
ग्रेटर नेपाल राष्ट्रवादी मोर्चाले विगत डेढ दशकदेखि १८१६ मार्च ४ मा बेलायतसँग भएको सुगौली सन्धिमा गुमेर फिर्ता हुन बाँकी जमिन फिर्ता गर्न अभियान चलाउँदै आएको छ ।
विज्ञप्तिमा भनिएको छ, ‘२६ जनवरी २०१९ का दिन दोहोर्याउँदै नेपाली भूमि सिक्किम , दार्जिलिङ , कुमाउ , गढवालमा गणतन्त्र दिवस मनाउन लागेकामा मोर्चा त्यसको भर्त्सना गर्दछ । यस घडीमा मोर्चा नेपाल र भारतका दुवै सरकारलाई सन् १९६० मा संयुक्त राष्ट्र संघद्वारा पारित उपनिवेशको अन्त्यसम्बन्धी १५१४ नं। को प्रस्तावको पालना गरी संयुक्त राष्ट्र संघको निर्णयको सम्मान गर्न पनि थप आग्रह गर्दछ ।’
