नेपालब्रिटेन संवाददाता
लण्डन । गैरआवासीय नेपाली संघ (एनआरएनए) यूकेको आगामी कार्यकालका लागि निर्वाचन यही शनिबार हुँदैछ। अनलाइन मतदान सुरु हुनुअघि उम्मेदवारहरूले आ–आफ्नो प्रचारप्रसारलाई तीव्र बनाइरहेका छन्।
यसै सन्दर्भमा, उपाध्यक्ष (खुला तर्फ) पदमा उम्मेदवारी दिएकी डा. रक्षा थापाले बिहीवार इष्ट लण्डनमा नेपाली समुदायका अगुवासँग अन्तरक्रिया गरिन्। उनले समाजको लागि केही योगदान दिने पवित्र उद्देश्यसाथ उपाध्यक्ष पदमा उम्मेदवारी दिएको स्पष्ट पारिन्।
“धेरैले मलाई महिला उपाध्यक्षमा उम्मेदवारी दिन सुझाव दिनुभएको थियो,” उनले भनिन्, “तर म चुनौती सामना गर्न तयार छु भन्ने आत्मविश्वासका साथ खुला उपाध्यक्षमा उम्मेदवारी दिएको हुँ।”
इष्ट लण्डनको गुल्मी रेस्टुरेन्टमा आयोजित उक्त कार्यक्रममा नेपाली समुदायका प्रतिनिधिहरुको बाक्लो उपस्थिति थियो। कार्यक्रममा ग्रीनविच काउन्सिलका निवर्तमान मेयर तथा काउन्सिलर जीत रानाभाट लगायतको पनि उपस्थिति थियो।
त्यस अवसरमा महासचिव पदका उम्मेदवार पुन्य रेग्मीले शनिबार हुने निर्वाचनमा आफूलाई मत दिएर विजयी गराउन अपिल गरे।
एनआरएनए यूकेको निर्वाचनमा अध्यक्ष पदमा ३ जना, उपाध्यक्ष पदमा ४ जना, आइसीसी सदस्य पदमा ४ जना र सचिव पदमा ३ जनाले उम्मेदवारी दिएका छन्। निर्वाचन परिणाम शनिबार राति १० बजे सार्वजनिक हुने निर्वाचन समितिले जनाएको छ।
