मधेशी जनअधिकार फोरमले सातौ चरणको प्रधानमन्त्रीको निर्वाचनमा एकीकृत
माओवादीका उम्मेदार पुष्पकमल दाहाललाई मतदान गर्ने संकेत दिएको छ। फोरमका
सह-अध्यक्ष जयप्रकाश प्रसाद गुप्ताले पाँच चरणसम्मको निर्वाचनमा तटस्थ
रहेर छैटौ चरणमा 'नो भोट' को नीति लिएपछि त्यसैलाई निरन्तरता दिन नहुने
बताए।

'तटस्थ बस्न हुँदैन भन्ने महसुस गरेर नै हामी (संयुक्त लोकतान्त्रिक
मधेशी) मोर्चावाट अलग भई 'नो भोट'को अवस्थामा गएका हौं', गुप्ताले भने,
'अव तर्कका आधारमा पनि 'नो भोट'को नीतिलाई निरन्तरता दिन हुँदैन।' नो भोट
र तटस्थ रहनुवीच फरक नभएको प्रश्न उठेको पनि उनले बताए। 'त्यसैले पनि कुनै
एक उम्मेदारलाई मतदान गर्नुपर्छ भन्ने दवाव पार्टीभित्र छ', उनले भने। तर,
पार्टीमा काग्रेस उम्मेदार रामचन्द्र पौडेललाई मतदान गर्ने पक्षमा कुनै
सभासद पनि नभएको उनले बताए।

'हामीले मतदान गर्दा निर्णयक हुन्छ/हुँदैन भन्ने कुरालाई हेरिरहेका
छौं', उनले भने, 'त्यसैले पनि निर्णय चाहिं लिइसकेका छैनौं।' फोरमसँग
दाहाललाई मतदान गर्नुको विकल्प नरहेको पनि उनले बताए। 'कुनै गाउँमा उमेर
पुगेको एउटा केटा छ र केटी पनि एउटै छ भने विवाह हुने ती दुईबीच नै हो',
गुप्ताले माओवादी-फोरम सम्बन्धलाई अर्थ्याए।