नेपालब्रिटेन संवाददाता
काठमाडौँ । राष्ट्रिय स्वतन्त्र पार्टी (रास्वपा) को कैलालीस्थित गोदावरी नगर कार्य समितिका पदाधिकारी तथा सदस्यहरूले सामूहिक रूपमा राजीनामा दिएका छन् ।
मंगलबार बसेको नगर कार्य समिति बैठकले सामूहिक राजीनामा दिने निर्णय गरेको हो । त्यसअनुसार समितिका पदाधिकारी र सदस्यहरूले आफ्नो पदबाट अलग हुने घोषणा गरेका छन् ।
नगर सभापति दीपक ओझाका अनुसार कुनै बाह्य दबाब वा प्रभावका कारण नभई नयाँ नेतृत्वका लागि अवसर सिर्जना गर्ने उद्देश्यले सामूहिक राजीनामा दिइएको हो ।
कार्य समितिले निर्णय पुस्तिकामै पार्टीको सिद्धान्त तथा नगरस्तरको अपेक्षाअनुसार प्रभावकारी रूपमा काम गर्न नसकिएको निष्कर्षसहित नयाँ समितिलाई जिम्मेवारी सम्हाल्न मार्ग खुला गर्ने उद्देश्यले राजीनामा दिने निर्णय गरिएको उल्लेख गरेको छ ।
