काठमाडौं । नेपाल पत्रकार महासंघका कार्यबाहक अध्यक्ष रमेश विष्टले पनि पदबाट राजीनामा दिएका छन् । अध्यक्ष विपुल विपुल पोखरेलले यसअघि राजीनामा दिएर वरिष्ठ उपाध्यक्ष विष्टलाई कार्यबहकको जिम्मेवारी दिएका थिए । पोखरेल र विष्ट दुवैले राजीनामा दिनुको एउटा कारण हो, महासंघको नयाँ नेतृत्व चुन्नका लागि तोकिएको समयमा निर्वाचन हुन नसक्नु ।

महासंघको आगामी १२ असोजमा तय भएको निर्वाचन शुक्रबार स्थगन भएको थियो । निर्वाचन कार्यतालिकाअनुसार शुक्रबार मनोनयन दर्ताको कार्यसूची थियो । तर, विष्टको आग्रहमा अन्तिम समयमा आएर निर्वाचन समितिले अनिश्चितकालका लागि निर्वाचन स्थगन गरिएको सूचना जारी गरेको छ ।

विष्टले राजीनामा पत्रमा निर्वाचन गराउन असफल भएका कारण आफूले यस्तो निर्णय लिएको उल्लेख गरेका छन् । विष्टले विभिन्न राजनीतिक पार्टीका भातृ संस्थाहरुले महासंघलाई आफ्नो राजनीतिक र व्यक्तिगत स्वार्थपूर्ति गर्ने मैदान बनाएकाले निर्वाचन प्रक्रिया अघि बढ्न नसकेको स्पष्ट गरेका छन् । तोकिएको मितिमा निर्वाचन हुन नसकेकोसहित महासंघबाट भएका सबै कमजोरीहरूको नैतिक जिम्मेवारी लिँदै कार्यबाहक अध्यक्षबाट राजीनामा दिएको उनले उल्लेख गरेका छन् ।

‘नेपाल पत्रकार महासंघको केन्द्रीय साधारणसभा सम्पन्न भएको ६ महिनासम्म पनि नयाँ नेतृत्व चयनका लागि निर्वाचन हुन नसकेको विधितै छ । सदस्यता शुद्धीकरणमा देखिएको जटिलताबाट निर्वाचन सम्पन्न हुन नसकेको पृष्ठभूमिमा मैले कार्यबाहक अध्यक्षको जिम्मेवारी सम्हालेको हुँ,’ राजीनामामा भनिएको छ ‘महासंघको विधानको पालना हुन नसक्दा नेपालको प्रेस तथा अभिव्यक्ति स्वतन्त्रता, नागरिकको अधिकार र लोकतन्त्रको पहरेदार रुपमा झण्डै ७० वर्षदेखि खडा मुलुकुको अग्रणी संस्थाको यो अवस्था सृजना भएको हो भन्ने कुरा प्रष्ट छ । पछिल्लो परिघटनामा विभिन्न राजनीतिक पार्टीका भातृ संस्थाहरुले महासंघलाई आफ्नो राजनीतिक र व्यक्तिगत स्वार्थपूर्ति गर्ने मैदान बनाउँदा निर्वाचन प्रक्रिया अघि बढ्न नसकेको सबैका सामु छर्लङ्ग छ ।’

राजनीतिक दल आवद्ध पत्रकारका संगठनले महासंघको विधि विधान र संरचनालाई समेत लत्याएर पत्रकारितासँग साइनो नभएका करिब साढे ४ सय व्यक्ति सदस्यका रुपमा थप्न बाध्य पारेको विष्टको राजीनामा पत्रमा लेखिएको छ ।

विधानअनुसार महासंघको सदस्यताको फारम नभरेका, शुल्क नबुझाएका, पत्रकारिता क्षेत्रमा रहेको प्रमाण पेश नगरेका, जिल्ला र प्रदेश समितिबाट सिफारिस नभएका करिब साढे ४ सय व्यक्तिका विषयमा जिल्ला अध्यक्षहरुले प्रश्न उठाएपछि संगठनहरुले त्यसको उत्तर दिन र जिम्मेवारी लिन नसक्दा यहि असोज १२ गतेका लागि तोकिएको निर्वाचन नहुने निश्चित भएको विष्टले बताए ।

क्रियाशिल पत्रकारले सदस्यता लिन र जोगाउन संघर्ष गर्नु पर्ने तर पत्रकारिता क्षेत्रले नै नचिनेका व्यक्तिलाई घरमै सदस्यता पुर्‍याउने गलत अभ्यास हुर्किंदै जानु लज्जाको विषय वष्टले स्वीकार गरे । उनले पार्टीका भातृ संगठनको दबाबमा त्यस्ता व्यक्तिलाई सदस्य स्वीकार गर्दै जानु महासंघको गम्भीर झुल भएको स्वीकार गर्नुपर्ने उल्लेख गरे ।

पत्रकार महासंघलाई विगतदेखि निरन्तर प्रहार गरेर कमजोर बनाई आफ्नो स्वार्थ पूरा गर्न पल्केका तत्वहरूले पनि महासंघको निर्वाचनलाई अनिश्चित बनाउँन निरन्तर खेलिरहेको सबैले बुझेकै तथ्य रहेको उनले बताए ।

सहजै निर्वाचन हुने परिस्थितीमा पनि निर्वाचन भाँड्न दिएको दबाब र पठाइएका म्यासेज त्यसैका उदाहरण भएको विष्टले उल्लेख गरे र
पछिल्लो पटक विकसित भएको मुलुकको राजनीतिक सत्तासमिकरणको शिकार समेत पत्रकार महासंघ बन्न पुगेको बताए ।

दलगत रुपमा अघि सारिएका प्रस्तावित उम्मेदवारको जित–हारलाई दलहरुले आफ्नो प्रतिष्ठाको विषय बनाउनुले थप जटिलता उत्पन्न गराएको विष्टको भनाइ छ ।

सानाठूला जस्ता विषयमा पनि महासंघको केन्द्रीय कार्यालयदेखि प्रदेश र जिल्ला शाखाहरुमा तालाबन्दी गर्ने प्रवृति फेशनकै रुपमा अघि बढेको भन्दै उनले इतिहासकै कठिन मोडमा पुगेको पत्रकार महासंघको गिरेको साख फिर्ता ल्याउन लामो समय र परिश्रम लाग्ने निश्चत रहेको बताए ।