नेपालब्रिटेन संवाददाता
काठमाडौं । नेकपा (माओवादी केन्द्र) का नेता एवं सिन्धुली क्षेत्र नम्बर २ का सांसद राजन दाहालले आफ्नो नाम जोडेर सामाजिक सञ्जालमा गरिएको भ्रामक प्रचारप्रति गम्भीर आपत्ति जनाएका छन् ।
नेकपा माओवादी केन्द्रमा अध्यक्ष पुष्पकमल दाहाल ‘प्रचण्ड’ र उपमहासचिव जनार्दन शर्माबीचको असमझदारी केही दिनअघि सतहमा आएपछि सांसद राजन दाहाल प्रचण्डको पक्षमा उत्रिएका थिए । त्यसपछि उपमहासचिव शर्मा समर्थकले दाहालको विषयमा बिभिन्न टिका टिप्पणी गरेका थिए । सांसद दाहालले अनर्गल र भुठो प्रचार गरिएको भन्दै त्यसप्रति आपत्ति जनाएका हुन् ।
बिगतको घटनाको यथार्थ नबुझी कतिपयले आधारहीन सामग्रीलाई समाचारको रूपमा प्रस्तुत गरेको भन्दै दाहालले आलोचना गरेका छन् । सांसद दाहालको बारेमा जनयुद्धको समयमा आत्मसमर्पण गरेको आरोप लगाउँदै सामाजिक संजालमा दाहालका बिरोधीले प्रचार गरेका थिए ।
सांसद दाहालका अनुसार माओवादी जनयुद्धको बेला वि.सं.२०५३ साल माघ १ गते सिन्धुलीगढी प्रहरी चौकी आक्रमणको बिषयलाई लिएर हातहतियार खरखजाना सम्बन्धी मुद्दामा सिन्धुली काठमाडौं र बीरगञ्ज जेलमा सजाय भोगेर दाहाल २०५५ चैत २७ मा २ वर्षको जेल सजाय र ६ हजार जरिवाना तिरेर आफ्ना बुबा लिलानाथ दाहालको रोहबरमा थुनामुक्त भएका थिए । त्यसपछि सांसद दाहाल पार्टीले खटाएको र जिम्मेवारी दिएको स्थानमा खटिएका थिए । तर, दाहाल जेलमुक्त भएको घटनालाई अहिले आएर उनका बिरोधीले आत्मसमर्पण गरेको भनेर हल्ला फैलाएका दाहालको भनाई छ ।
दाहालले हाल पार्टी अनुशासन उल्लंघन र शहीद परिवारसँग अनैतिक सम्बन्धको आरोपमा कारबाहीमा परेका केही व्यक्तिहरूले उक्त पुरानो घटनालाई तोडमोड गरी सामाजिक सञ्जालमा भ्रामक स्टाटस लेखेर बदनाम गर्ने प्रयास गरिरहेका छन् । उनले ती स्टाटसहरूलाई आधार मानेर केहीले समाचार बनाएको भन्दै गम्भीर आपत्ति जनाएका छन् ।
सांसद दाहालले भने ‘यो मुद्दाको कुनै पनि पक्ष सांसद राजन दाहालसँग प्रत्यक्ष रूपमा सम्बन्धित छैन। यस्ता भ्रामक प्रचारप्रति मेरो गम्भीर आपत्ति छ। सबैलाई सत्य बुझ्न र यस्ता भ्रममा नपर्न अनुरोध गर्दछु।’
