नेपालब्रिटेन संवाददाता
काठमाडौँ । नेकपा एमालेका सचिव महेश बस्नेतले प्रहरीबाट आफूहरूमाथि दमन भएको बताएका छन् ।
यही दमनको अवस्था रहिरहे भोलि देशभर आन्दोलन चर्काउने बताए । बस्नेतले प्रधानमन्त्री बालेन्द्र साह र गृहमन्त्री सुधन गुरुङलाई पूर्वाग्रह र प्रतिशोधको मूल्य अत्यन्त महँगो गर्ने चेतावनी दिएका छन्।
उनले भने, ‘पूर्वाग्रह र प्रतिशोधको मूल्य अत्यन्त महँगो हुन्छ । अध्यक्ष केपी शर्मा ओलीलाई अविलम्ब रिहा गर, बालेन सरकार र कथित गृहमन्त्री सुधन गुरुङ । तिमीहरूको गलत निर्णयले दुईतिहाइको सरकारले शपथ लिएको दिनदेखि नै दिनगन्ती सुरु भइसकेको छ ।’
उनले भने, ‘यही अवस्था रहेमा भोलि १२ बजे पार्टीका देशभरका जिल्ला सदरमुकामहरूमा हुने आन्दोलन अझ सशक्त र प्रतिरोधात्मक बन्नेछ ।’
त्यसका साथै उनले आज गरिएको प्रहरी दमनविरुद्ध भोलि पनि माइतीघर मण्डलामा जनसंगठनहरूको आन्दोलन निरन्तर रहने बताएका छन् ।
आफ्नो पार्टीका अध्यक्ष केपी शर्मा ओलीलाई पक्राउ गरेको विरोधमा एमालेले आजैबाट प्रदर्शन थालेको छ ।
